رباعيات ( صلاح جاهين )

رباعيات " صلاح جاهين "

مع إن كل الخلق من أصل طين
وكلهـم بينزلـوا مغمضيــــــــــ ن
بعد الدقايق والشهور والسنين
تلاقي ناس أشرار وناس طيبين
عجبي !!

عجبي عليك ... عجبي عليك يا زمن
يابو البدع يا مبكي عيني دمـــــــــــاً
إزاي أنا أختار لروحي طريـــــــــــق
وأنا اللي داخل في الحياة مرغمــــــــاً
عجبي !!

مرغم عليك يا صُبح مغصوب يا ليل
لا دخلتها برجليا ولا كانلي ميـــــــــــل
شايلني شيل دخلت أنا في الحيـــــــاة
وبكره ح أخرج منها شايلني شيــــــل
عجبي !!

سنوات وفايته عليا فوج بعد فــوج
واحدة خدتني إبن .. والتاينة زوج
والتالتة أب خدتني والرابعة إيــــه
إيه يعمل إللي بيحدفه موج لموج ؟
عجبي !!

خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا ... وحي بيصير تراب
الأصل هو الموت و الا الحياه ؟
عجبي !!!

ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي !!!

ياما صادفت صحاب و ما صاحبتهمش
و كاسات خمور و شراب و ما شربتهمش
أندم علي الفرص اللي انا سبتهم
و الا علي الفرص اللي ما سبتهمش
عجبي !!

و الكون ده كيف موجود من غير حدود
و فيه عقارب ليه و تعابين ودود
عالم مجرب فات و قال سلامات
ده ياما فيه سؤالات من غير ردود
عجبي !!!

أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي !!!!

يا باب يا مقفول ... إمتي الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول
عجبي !!!

موضوع جميل
كمل لنا الباقى بقى

عجبي عليك ... عجبي عليك يا زمن
يابو البدع يا مبكي عيني دمـــــــــــاً
إزاي أنا أختار لروحي طريـــــــــــق
وأنا اللي داخل في الحياة مرغمــــــــاً
عجبي !!

كلام جمييييييييييييييييييييل
ونايس توبيك منسي